Жиззахда ноқонуний балиқ овлаш табиатга 387 млн сўм зарар етказди. Бу ҳақда ИИВ хабар берди.
2 январь куни Қўриқлаш департаментининг Айдар-Арнасой кўллар тизимини муҳофаза қилиш бошқармаси ходимлари кўлнинг назорат ҳудудида тунги вақтда ҳаракатланаётган Lacetti’ни тўхтатиб кўздан кечирганда, автомобиль юкхонасидан ноқонуний тутилган жами 344 дона 4 хил турдаги балиқ маҳсулотлари борлиги аниқланди.
Шу куни кўл ҳудудида қайиқ ва тўр ёрдамида балиқ маҳсулотларини ноқонуний равишда овлаётган 2 нафар фуқаро қўлга олинди. Дастлабки ўрганишлар жараёнида фуқароларнинг олдида 40 дона судак туридаги балиқ маҳсулоти борлиги аниқланди.
Ҳозирда ҳолатлар бўйича тегишли ҳужжатлар расмийлаштирилиб, кўриб чиқиш учун суд органларига жўнатиш чоралари кўрилмоқда.
Овланган балиқ маҳсулотлари ҳудудга хизмат кўрсатувчи МЧЖга топширилди. Ноқонуний балиқ овлаш табиатга келтирилган тахминий зарар 387 млн сўмни ташкил қилади.
