Исроил армиясининг Ғазо секторидаги урушида 50 мингдан ортиқ хорижий фуқаро қатнашган. Шулардан 264 нафари икки фуқароликка эга Ўзбекистон фуқаролари ҳисобланади. Бу ҳақда Al Jazeera хабар берди.
Маълумотларга кўра, Ғазога қарши ҳарбий ҳаракатларда қатнашганларнинг аксарияти АҚШ ёки Европа давлатлари паспортига эга. 2023 йил 7 октябрда бошланган уруш оқибатида Ғазода камида 72 061 киши ҳалок бўлган.
Дунё бўйлаб ҳуқуқни ҳимоя қилувчи ташкилотлар Ғазодаги воқеалар билан боғлиқ эҳтимолий ҳарбий жиноятларда иштирок этган хорижий фуқароларни аниқлаш ва уларни жавобгарликка тортиш масаласини кўтармоқда. Айрим ҳарбийлар ижтимоий тармоқларда ўз ҳаракатларини акс эттирган видеоларни ҳам жойлаштирган.
Қайси давлат фуқаролари энг кўп хизмат қилмоқда?
Исроил армиясида камида 12 135 нафар АҚШ фуқароси хизмат қилмоқда, бу энг юқори кўрсаткич ҳисобланади. Бундан ташқари, 1 207 нафар аскар АҚШ ва Исроил фуқаролигидан ташқари яна бошқа давлат паспортига ҳам эга.
Франция 6 127 нафар фуқаро билан иккинчи ўринда, Россия эса 5 067 нафар фуқаро билан учинчи ўринда турибди. Шунингдек, 3901 нафар Германия фуқароси, 3 210 нафар украиналик, 1 686 нафар британиялик ва 1675 нафар руминиялик Исроил армияси сафида хизмат қилмоқда.
Исроилга қарши Халқаро судда геноцид бўйича даъво киритган давлат — Жанубий Африкадан ҳам 589 нафар фуқаро яҳудий армиясида ишламоқда.
Марказий Осиё давлатлари кесимида
Ўзбекистон фуқаролари Исроил армиясида сафида фаолият юритиши бўйича 126 давлат ичида 27-ўринни эгаллаган. Икки фуқароликка эга ўзбекистонликлар 264 нафарни (улар Исроил фуқаролигига ҳам эга), кўп фуқароликка эга бўлганлар (Ўзбекистон, Исроилдан ташқари яна бошқа фуқаролиги ҳам бор) эса 5 нафарни ташкил этади.
Марказий Осиё давлатлари бўйича кўрсаткичлар қуйидагича:
- Қозоғистон — 189 нафар (икки фуқаролик), 3 нафар (кўп фуқаролик)
- Қирғизистон — 52 нафар (икки фуқаролик), 3 нафар (кўп фуқаролик)
- Туркманистон — 31 нафар (икки фуқаролик), 2 нафар (кўп фуқаролик)
- Тожикистон — 8 нафар (икки фуқаролик).
Исроил армияси тахминан 169 минг фаол ҳарбий ва 465 минг захирадаги аскардан иборат. Уларнинг қарийб саккиз фоизи икки ёки ундан ортиқ фуқароликка эга.
Ўзбекистон фуқароларига чет давлатларининг ҳарбий хизматига ёлланиш тақиқланган
Ўзбекистон Жиноят кодексининг 154-моддасига кўра, ҳарбий ҳаракатларда қатнашиш учун ёлланиш 10 йилгача озодликдан маҳрум этишга сабаб бўлади. Урушга одамларни ёллаш, уларни ўқитиш ва улардан ҳарбий ҳаракатларда фойдаланиш 12 йилгача озодликдан маҳрум қилишга олиб келади.
Жиноят кодексининг 154-1-моддасига асосан, чет давлатлар ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга ёлланган Ўзбекистон фуқаролари 5 йилгача озодликдан маҳрум қилинади.
