Бразилияда кучли ёғингарчилик ортидан юзага келган сув тошқинлари оқибатида ҳалок бўлганлар сони 46 кишига етди. Бу ҳақда Reuters хабар берди.
Тошқин ва кўчкилар сабабли Жуиз де Фора ҳамда Уба шаҳарларида (бир-биридан қарийб 110 км узоқликда) 3 600 га яқин киши уйини тарк этишга мажбур бўлган. Расмийлар 21 киши бедарак йўқолганини маълум қилди.
24 февраль куни ёмғир кўлами пасайди, расмийлар ҳамда кўнгиллилар уй-жойидан ва яқинларидан айрилган аҳолига ёрдам кўрсатишни бошлади. Жуиз де Фора мэри Маргарида Саломао хавфли ҳудудларда яшовчиларни уйларини тарк этиб, шаҳар ҳокимияти ташкил этган бошпаналарга мурожаат қилишга чақирди.
Бразилия федерал ҳукумати минтақага гуманитар ёрдамни тезлаштирди. Ҳудудга соғлиқни сақлаш ходимлари ва миллий мудофаа мутахассислари юборилди. Мамлакатда декабрдан мартгача кучли ёғингарчилик, момақалдироқ, сув тошқинлари ва кўчкилар тез-тез кузатилади.
Президент Луис Инасиу Лула да Сильва жабрланганларга ҳамдардлик билдирди. Бразилия Мудофаа вазирлиги вайроналарни тозалаш, вақтинчалик бошпаналар ташкил этиш ва гуманитар операциялар ўтказиш учун ҳарбийларни юборди. Жуиз де Фора мэрияси маълумотига кўра, бу шаҳар тарихидаги энг ёмғирли февраль бўлди. Ёғингарчилик миқдори аллақачон ойлик меъёрдан икки баравар ошган.
