Тошкент халқаро аэропортида 8 декабрь куни муҳим юк операцияси амалга оширилди, деб хабар бермоқда Uzbekistan Airports.
Маҳаллий вақт билан соат 1:15 да аэропортга Air Atlanta Icelandic авиакомпаниясининг Boeing 747-400 юк рейси келиб қўнди. У Тошкентга Бельгиянинг Леж шаҳридан 93 тонна тирик қорамол олиб келди.
Самолёт бортида Германия ва Австриядан келтирилган Simmental ва Golshtin зотларига мансуб сигирлар олиб келинди. Simmental сут ва гўшт ишлаб чиқаришда универсаллиги билан машҳур, Golshtin эса юқори сут соғими ва маҳсулдорлиги билан танилган.
Чорва молларни бортдан тушириш ва олиб кетиш барча ветеринария талабларига мувофиқ амалга оширилди.
Ўзбекистонда наслдор чорва импортига субсидия 2030-йилгача узайтирилди. Наслдор 1 кунлик жўжалар импорти учун белгиланган субсидия 2026 йил 1 январдан 2030 йил 31 декабргача фақат маҳаллий ишлаб чиқарувчилардан гўшт йўналишида уларни харид қилинганда ажратилади.
Келаси йил 1 январдан 2027 йил якунига қадар тирик йирик шохли қорамол, эчки ва қўйларни импорт қилишда:
- ҳисобланган ҚҚСни 180 кунгача кечиктириб тўлашга рухсат берилади;
- тўланган ҚҚСнинг ўрнини қоплаш (қайтариб бериш) қонунчиликда белгиланган тартибда амалга оширилади.
2026-йилнинг илк кунидан ветеринария рухсатномаси ва сертификати 2 баравар қисқартирилган муддатда кўриб чиқилади.
Ушбу санадан чорвачилик маҳсулотлари ишлаб чиқарувчи тадбиркорларга озуқабоп экинларни етиштириш учун электрон онлайн аукцион савдолари орқали ер участкаларини ижарага олиш ҳуқуқини сотиб олиш тўловларини 5 йил муддатда тенг улушларда бўлиб-бўлиб тўлаш имкони ҳам яратилади.
