АҚШ иммиграция сиёсатини кучайтириш доирасида Эрон фуқароларининг иккинчи гуруҳини мамлакатдан депортация қилди. Бу ҳақда Теҳрон расмийларига таяниб BBC хабар берди.
Маълум қилинишича, 7 декабрь куни Аризона штатининг Меса шаҳридан 50 дан ортиқ Эрон фуқаросини олиб кетган чартер самолёти Қоҳира ва Кувайт орқали учиб, Эронга қўнган. Теҳрон Ташқи ишлар вазирлиги бу фуқароларнинг мамлакатга қайтганини тасдиқлаган. Бироқ АҚШ иммиграция хизмати хавфсизлик сабабли парвозни тасдиқлаш ёки инкор этишни рад этган.
Бу депортация Эрон ва АҚШ ўртасидаги кам учрайдиган ҳамкорлик натижасида амалга оширилди. Бу каби илк парвоз сентябрь охирида амалга оширилган эди. Қайд этиш жоиз, икки ҳолат ҳам президент Дональд Трамп маъмурияти даврида амалга оширилмоқда. Аксарият Эрон фуқаролари ўз ватанида таъқибга учраш хавфи борлиги сабабли АҚШга келганини даъво қилади.
Мигрантларга ёрдам кўрсатувчи Францискан ташкилоти вакилининг айтишича, депортация қилинганлар орасида насронийликни қабул қилганлар ҳам бор. Шунингдек, баъзи ҳибсга олинганлар LGБТ вакиллари экани қўшимча қилинган. Бундай шахсларни одатда Эронда жиддий ҳуқуқий ва ижтимоий жазолар кутади.
“Депортация қилинган фуқаролар Қўшма Штатлар томонидан хорижликларга, хусусан, эронликларга нисбатан иммиграцияга қарши ва камситувчи сиёсат давом этаётгани ортидан ўз ватанларига қайтиш истагини билдирган”, дейилади форс суд тизимига алоқадор Мizon ахборот агентлигининг хабарида.
