Бугун, 15 февраль куни Исроил Ғазо секторининг турли ҳудудларига ҳаводан зарба берди. Reuters’нинг Фаластин расмийларига таяниб хабар қилишича, камида 11 нафар фаластинлик ҳалок бўлган. Тель-Авив эса сулҳни бузишда ҲАМАСни айблаб, авиазарбалар жавоб чораси бўлганини таъкидлади.
Ғазода фаолият кўрсатаётган шифокорларнинг агентликка маълум қилишича, Исроил самолётларидан бири кўчирилган оилалар чодир тикиб яшаётган лагерни нишонга олган. Натижада камида тўрт киши ҳалок бўлган. Бундан ташқари, Хон Юнисда яна тўрт киши, анклав шимолида эса бир нафар ғазолик ўлдирилган.
Бундан ташқари, Исроил ҳарбий ҳаво кучлари Ғазонинг Тел ал-Ҳава ҳудудига ҳам зарба берган. Ҳужум нишонида “Фаластин исломий жиҳод” гуруҳи қўмондони бўлгани айтилмоқда. Ҳозирча қуролли гуруҳ ҳолат юзасидан баёнот бермади.
ҲАМАСнинг Ғазодаги вакили Ҳазем Қосим Исроилнинг зарбаларига муносабат билдириб, буни кўчирилган фаластинликларга нисбатан янги қирғин деб атади. Шунингдек, яҳудий давлати сулҳ шартларини жиддий равишда бузганини таъкидлади.
Исроил армияси вакили эса Reuters билан суҳбатда зарбалар “юқори аниқликда ва халқаро ҳуқуққа мувофиқ” берилганини таъкидлади. У, шунингдек, Фаластин қуролли гуруҳи сулҳ имзоланган 2025 йил октябрь ойидан буён уни бир неча бор бузганини даъво қилди.
“Исроил мудофаа кучлари яқинидан қуролланган ҳолда ‘сариқ чизиқ’ни кесиб ўтиш сулҳнинг очиқ бузилишидир. Бу ҲАМАС сулҳ келишувини тизимли равишда бузиб, Исроил аскарларига зарар етказишга уринаётганини кўрсатади”, деди у.
Бу Исроил ва ҲАМАС бир-бирини сулҳни бузишда айблаган ягона ҳолат эмас. АҚШ воситачилигидаги тинчлик битими кучга кирганидан буён яҳудий давлат Ғазога вақти-вақти билан зарба бериб, камида 600 нафар ғазоликни ўлдирган. ҲАМАС кафил томонларга мурожаат қилиб, Исроилнинг ҳаракатларини тийиб қўйишга чақирган.
