Тошкент шаҳрида фуқародан ҳисоблагич йўқлиги сабабли ишларини бости-бости қилиб бериш эвазига қарийб 1 000 АҚШ доллари талаб қилган Юнусобод тумани газ таъминоти бўлими ходими қўлга олинди. Бу ҳақда Ички ишлар вазирлиги хабар берди.
Маълум қилинишича, фуқаро Тошкент шаҳар ИИББга мурожаат қилиб, Юнусобод тумани газ таъминоти бўлимида ишловчи масъул шахс газ ҳисоблагич ўрнатилмаганлиги сабаб далолатнома тузмаслик, жаримага тортмаслик ва ҳужжатларни тўғрилаб бериш эвазига 12 миллион сўм пул талаб қилаётганлиги ҳамда у шу кунга қадар 1 миллион 200 минг сўм берганлигини маълум қилиб, мазкур шахсга нисбатан қонуний чора кўришни сўраган.
Ҳуқуқни муҳофаза қилувчи органлар томонидан ўтказилган тезкор тадбирда Юнусобод тумани газ таъминоти бўлимида ишловчи масъул шахс фуқародан 12 миллион сўмдан қолган 10 миллион 800 минг сўм пулларни олган вақтида ашёвий далиллар билан ушланган.
Аниқланишича, мазкур шахс газ таъминоти бўлимида жабрланувчининг маҳалласига бириктирилмаган ходим бўлган.
Билдирилишича, ҳолат юзасидан Жиноят кодекси 168-моддаси учинчи қисми “в” банди (хизмат мавқейидан фойдаланган ҳолда фирибгарлик қилиш) билан жиноят иши қўзғатилган.
