Перу суди 26 ноябрь куни мамлакат собиқ президентини пора олишда айбдор деб топди. Суд унга 14 йиллик қамоқ жазоси тайинлади. Шу тариқа у коррупция сабаб жазоланган собиқ президентлар рўйхатига қўшилди. Бу ҳақда Reuters хабар берди.
Маълум қилинишича, Вискарра 2011-йилдан 2014-йилгача жанубий Моқуэгуа провинцияси губернатори лавозимида ишлаган. Шу даврда у жамоат ишлари бўйича шартномалар эвазига қурилиш фирмаларидан 676 минг долларга тенг миқдорда пора олган.
Унга қарши суд иши эса 2024-йилнинг октябрь ойида бошланди, Вискарра ўзига қўйилган айбловларни рад этиб, сиёсий таъқиблар қурбони бўлганини айтди. У 2018-йилда аввалги президент истеъфога чиққач ҳокимиятга келган, бироқ икки йил ўтиб коррупция бўйича терговлар фонида Конгресс томонидан лавозимидан четлатилган.
“Бу адолат эмас, бу қасос. Аммо улар мени синдиролмайди”, деди Вискарра ҳукм чиқарилгандан кейин.
Унга 9 йил давомида давлат лавозимларида ишлаш ҳам тақиқланган. Вискарранинг юридик жамоаси ҳукм устидан апелляция берганини маълум қилди.
Сиёсатчининг укаси Марио Вискарра 2026 йил апрель ойида бўлиб ўтадиган президентлик сайловларида “Перу First” партиясидан номзод бўлишни режалаштирмоқда. Бу партияда собиқ президент асосий маслаҳатчи сифатида фаолият юритган.
“Жавоб сайлов участкасида. Бу курашни укам Марио Вискарра давом эттиради”, деди собиқ етакчи.
2021-йилги сайловларда марказий сўл сиёсатчи сифатида қатнашган Вискарра Конгресс номзодлари орасида энг кўп овоз тўплаган. Бироқ у 2019-йилда парламентни тарқатиб юборгани учун 10 йилга давлат лавозимларидан маҳрум қилинган.
Унинг судланиши “Лава Жато” можаросини текшираётган прокуратура учун навбатдаги муҳим ғалаба бўлди. Мазкур можаро Бразилиянинг Одебречт (ҳозирги номи Новонор) компанияси иштирокидаги йирик пора схемаси билан боғлиқ бўлиб, Лотин Америкасидаги кўплаб сиёсий етакчиларни қамраб олган.
Перу 2018-йилдан бери коррупция можаролари туфайли импичментлар ва истеъфолар натижасида олтита президентни алмаштирган ҳолда сиёсий беқарорлик гирдобида қолмоқда. Вискарра уч нафар собиқ президент сақланаётган Лима қамоқхонасига олиб кетилиши кутилмоқда. Алежандро Толедо ва Олланта Ҳумала коррупция учун жазони ўтаяпти, Педро Кастилё эса исёнчиликда айбланиб ҳибсда сақланмоқда.
