Австрияда йирик йўл ҳаракати ислоҳоти бошланмоқда. 2026 йил 1 майдан бошлаб мамлакатнинг бир қатор шаҳарларида махсус видео кузатув тизими ишга туширилади.
«У шаҳар марказлари, тарихий ҳудудлар ва турар жой кварталларига автомобиллар киришини назорат қилади», – деб хабар берди Kronen Zeitung.
Транспорт вазири Петер Ханкэ тақдим этган қонун лойиҳасига кўра, Вена, Линц ва Грацни қўшиб ҳисоблаганда 25 та шаҳар мазкур дастурда иштирок этишга тайёрлигини билдирган.
Янги тартибга биноан, камералар барча давлат рақамларини автоматик равишда ўқийди ва уларни махсус маълумотлар базаси билан солиштиради. Фақат маҳаллий аҳоли, етказиб бериш хизматлари ва тез ёрдам каби махсус хизматлар машиналарига кириш рухсат этилади.
Рухсатсиз кириш маъмурий ҳуқуқбузарлик ҳисобланади. Жарималар миқдори 70 евродан 2180 еврогача бўлиши мумкин. Ҳайдовчиларни огоҳлантириш учун махсус белгилар ва «Kontrolle der Zufahrt» («Кириш назорати») ёзувли йўл белгилари ўрнатилади.
Транспорт вазирлиги маълумот беришича, тизим шахсий маълумотларни эмас, фақат машина рақамларини сақлайди, шу билан шахсий маълумотларни ҳимоя қилиш қонунларига риоя қилинади. Лекин назоратга чет эл автомобиллари ҳам тушади.
Ислоҳотнинг асосий мақсади – шаҳар марказларида ҳаво ифлосланишини, шовқин даражасини ва тирбандликни камайтириш. Айниқса, Вена шаҳар ҳокимияти бу орқали «кўчаларни одамларга қайтаришни» мақсад қилган.
