Болгария ҳукумати 2026 йил учун Россиянинг МиГ-29 ва Су-25 русумли қирувчи самолётларига техник хизмат кўрсатиш мақсадида 114 миллион лева (тахминан 58 миллион евро) ажратди.
Бу кўрсаткич 2024–2025-йилларга нисбатан қарийб 10 миллион лева (5 миллион евро) кўпдир. Мудофаа вазирлигининг ҳисоб-китобига кўра, келгуси йилда МиГ-29 самолётларини хизматда ушлаб туриш учун 86,4 миллион лева, Су-25 учун 27,6 миллион лева йўналтирилади. Бу маблағ асосан эҳтиёт қисмлар, ёнилғи ва бошқа техник хизмат харажатларини ўз ичига олади.
Таққослаш учун, 2024–2025-йилларда бу икки турдаги самолётларга техник хизмат кўрсатиш учун жами 104 миллион лева ажратилган. Сўнгги беш йилда бу самолётлардан учувчиларни тайёрлашда фойдаланилмаган. Шу сабабли бу сафарги маблағда ҳам ўқув харажатлари ҳисобга олинмаган.
Самолётлар янги Ф-16 лар етиб келмагунча хизматда қолади
Мудофаа вазири Атанас Запрянов парламент мажлисида қуйидагича баёнот берди:
“МиГ-29 ва Су-25 ни муддатидан аввал хизматдан чиқариш Болгария ҳарбий-ҳаво кучларини зарур имкониятлардан маҳрум қилади ва узоқ вақт давомида конституциявий ҳамда иттифоқ мажбуриятларини бажаришга тўсқинлик қилади”.
Унинг айтишича, совет давридаги бу самолётлар фақат янги Ф-16 лар тўлиқ тайёр ҳолатга келгач, босқичма-босқич хизматдан олинади.
