Франция ҳукумати Telegram асосчиси Павел Дуровдан ҳаракатланиш чекловларини бутунлай олиб ташлади. Бу ҳақда манбаларга таяниб, Bloomberg хабар берди.
Манбаларга кўра, қарор 10 ноябрь куни қабул қилинган. Дуров “суд назоратига тўлиқ риоя қилган” ва уч марта сўроқ қилинган. Энди у Францияни эркин тарк этиши мумкин ва маҳаллий полиция бўлимида мунтазам рўйхатдан ўтиб туришга мажбур эмас.
Дуров 2024 йилнинг август ойида Париж аэропортида ҳибсга олинган эди. Дастлаб унга мамлакат ҳудудидан чиқиш тақиқланган. 2025 йил июнь ойида эса чекловлар юмшатилиб, унга Дубайга бориб келишга рухсат берилган.
Бизнесмен Telegram’даги контентни етарлича модерация қилмаслик ва Франция ҳуқуқ-тартибот органлари билан ҳамкорликдан бош тортиш билан боғлиқ тергов доирасида ушланганди. Унга терроризм, гиёҳванд моддалар, фирибгарлик, болаларга қарши жиноятлар билан боғлиқ айбловлар қўйилиши мумкин.
Дуров компания раҳбари сифатида платформа фойдаланувчилари томонидан содир этилаётган жиноятларда айбланаётганидан ҳайронлигини билдирган.
“Йирик платформа бош директорининг унинг фойдаланувчилари хатти-ҳаракатлари учун ҳибсга олиниши нафақат мисли кўрилмаган, балки юридик ва мантиқий жиҳатдан ҳам абсурд. Бир йил ўтгач, менга қарши ҳали ҳам “жиноий тергов” олиб борилмоқда, аммо мен ёки Telegram томонидан нотўғри қилинган бирор нарса топилмади”, деди у.
2024 йил декабрь ойидаги сўроқ вақтида Дуров Telegram’га қўйилаётган айбловларнинг “жиддийлигини англаганини” айтган ва мессенжер “жиноятчилар учун яратилмаганини” таъкидлаган, деб ёзади Le Figaro.
У Telegram’да жиноятчилар улуши унча катта бўлмаса-да, бир оз ошганини тан олган ва бунинг учун чоралар кўриш зарурлигини билдирган. Дуровнинг бойлиги 14,7 миллиард доллар бўлиб, йил бошидан буён 3,71 миллиард долларга ошган. У Bloomberg миллиардерлар рейтингида 196-ўринни эгаллаб турибди.
