Россияда Telegram асосчиси Павел Дуровга қарши жиноят иши очилди. Бу ҳақда “Astra” нашри хабар берди.
Қайд этилишича, Тelegram маъмурияти Роскомнадзор талабларини бажармагани ва 1 369 канал, чат ва ботларни болалар порнографияси билан боғлиқ, 3 771 та наркотиклар билан, 2 666 та ўз жонига қасд қилиш билан, 2 124 та вояга етмаганларни ноқонуний фаолиятга жалб қилиш билан боғлиқ каналларни ўчирмаган. Бундан ташқари, 10,5 мингдан ортиқ канал экстремизмга чақирувлар ва “душманни молиялаштириш” билан боғлиқ экани, 1 125 каналда экстремистик ва террористик ташкилотлар материаллари жойлаштирилгани келтирилган.
Ҳозирда бу айбловлар юзасидан Дуровга қарши Россия Федерацияси Жиноят кодексининг 205.1-моддаси, 1.1-қисми (террорчилик фаолиятини қўллаб-қувватлаш) бўйича жиноий иш очилган.
Хабарда келтирилишича, аноним бўлиш иллюзияси мессенжерга радикаллар, наркоманлар, қотиллар ва террорчиларни жалб қилган, бу эса жамиятда таҳдидлар пайдо бўлишига олиб келган.
Россия ИИВ ва Федерал хавфсизлик хизмати 2022 йилдан бери мессенжер 153 минг жиноятда иштирок этгани, шундан 33 000 таси саботаж-террор ва экстремистик йўналишда бўлгани ҳақида маълумот берган. Қолаверса, мессенжер орқали содир этилган жиноятлар қаторида “Crocus City Hall”даги террор ҳужуми тилга олинган. Таъкидланишича, Украина билан уруш шароитида Тelegram “НАТО давлатларининг махсус хизматлари ва Киев режими”нинг асосий воситасига айланган.
