Эроннинг янги олий раҳнамоси Можтаба Хоманаий соғлиғи ва хавфсизлиги билан боғлиқ муаммолар туфайли Россия ҳарбий самолётида Москвага олиб кетилган. Бу ҳақда Хоманаийга яқин юқори мартабали манба Кувайтнинг Al Jarida газетасига маълум қилди.
Маълумотларга кўра, Хоманаий махфий операция орқали Москвага олиб кетилган. У Россияга етиб боргач жарроҳлик амалиёти ўтказилган. Ҳозирда Эрон олий раҳнамоси президент Владимир Путиннинг қароргоҳларидан биридаги хусусий касалхонада даволанмоқда.
Можтаба 28 февраль куни АҚШ ва Исроилнинг Эронга қилинган дастлабки ҳужумлари вақтида тан жароҳати олган. Манбаларга кўра, Эроннинг янги олий раҳнамосида оёқ синиши ва юзида лат ейиш кузатилган. Можтаба учун қаттиқ тиббий назорат ва махсус кузатув талаб этилган. Исроил янги олий раҳнамони ўлдиришни режалаштиргани сабабли Можтабани Эронда етарли тиббий шароит билан таъминлаш қийин бўлган.
Эрон хавфсизлик идоралари Хоманаий қаерда экани ҳақидаги маълумотлар уни даволаётган шифокорлар ва мутахассисларни кузатиш орқали ошкор бўлишидан хавотирланган. Шу сабабли Эроннинг янги олий раҳнамосини Россияда даволашга келишилган.
“Россия президенти Владимир Путиннинг ўзи ўтган ҳафта эронлик ҳамкасби Масъуд Пезешкиён билан бўлган суҳбатида Можтабани Россияда даволашни таклиф қилган”, дейди манба.
Эрон расмийлари Россия таклифини синчковлик билан кўриб чиқиб, буни маъқуллаган.
“Можтаба ҳақиқатан ҳам ўтган ҳафта кечқурун у ерга кўчирилди, у россиялик шифокорлар ва унга ҳамроҳлик қилаётган бир қатор эронлик шифокорлар билан даволанмоқда”, деди манба.
