Туркиянинг “Фенербаҳче” клуби президенти Садеттин Саран ўзининг медиа гуруҳига қарашли “S Sport” платформасида футбол учрашувлари вақтида букмекерлик хизматларини реклама қилгани учун икки йил олти ой муддатга озодликдан маҳрум қилинди. Бу ҳақда NTV телеканали хабар берди.
Шунингдек, Саранга 562,5 минг турк лираси (қарийб 12,2 минг доллар) миқдорида жарима ҳам тайинланган. Суд қарори “ноқонуний қимор ва пул тиктириш фаолиятини тарғиб қилиш” айби бўйича чиқарилган.
NTV маълумотларига кўра, ҳукм эълон қилинган вақтда Саран суд мажлисида иштирок этмаган.
Аввалроқ, Туркия футболида ноқонуний букмекерлик билан боғлиқ йирик можаро юзага келгани хабар қилинган эди. Тергов натижаларига кўра, Туркия Футбол федерацияси (TFF) мингдан ортиқ футболчи, спорт амалдори ва 149 нафар ҳакамга нисбатан интизомий чоралар кўрган.
Маълум бўлишича, уларнинг ҳисобларидан маҳаллий ва хорижий букмекерлик компанияларида спорт ўйинларига пул тиккан ҳолда фойдаланилган.
TFF раҳбари Иброҳим Ҳожиосманўғлининг маълум қилишича, хорижий онлайн букмекерлик платформаларидаги ноқонуний пул тикувлари туфайли Туркия иқтисодиёти тахминан 52 миллиард доллар зарар кўрган.
