1991 йилда Ўтзтал Алп тоғларида аниқланган мумияда унинг аста-секин емирилишига олиб келиши мумкин бўлган замбуруғ ва бактериялар аниқланди. Бу ҳақда Миcробиоме журналида эълон қилинган тадқиқотда маълум қилинди.
Ҳозирда мумия Жанубий Тирол археология музейида сақланмоқда, у Эци деб номланган мис даври одамига тегишли. Ҳозирча махсус ҳарорат ва намлик режимини сақлаш (мумия — 6 даража ҳароратда ва 99 фоиз намликда сақланади) мумияни чиришдан сақлаб келмоқда. Аммо бу чоралар микроб фаоллигини тўлиқ тўхтата олмайди.
Тадқиқотчилар мумия терисидан, тўқималаридан, ундан ажралиб чиққан намликдан, шунингдек, мумия топилган жойдан олинган тупроқ намуналарини олиб, нафақат ҳозирги, балки қадимий микроорганизмларни ҳам ажратиб олишга муваффақ бўлди. Натижада улардан баъзилари, масалан, ичак бактериялари Эци тириклигидаёқ унинг танасига ўрнашиб олгани аниқланди.
Эци — бу беқарор мувозанатда турган микроэкотизимдир, дейди Мадрид автоном университети биологи Давид Веласкес.
Мумия терисида оқсиллар, ёғлар ва коллагенни парчалашга қодир бўлган совуққа чидамли ачитқи замбуруғининг тўрт тури ва мумияга ишлов беришда қўлланган замбуруғларга қарши консервант — фенолни парчалайдиган бактериялар топилган.
Мумияни асраб қолиш учун энг маъқул йўл уни қайта музлатишдир. Аммо бу қадам уни илм-фан ва музей ташриф буюрувчилари учун ёпиб қўяди. Бунинг ўрнига, музей ходимлари микроорганизмларни синчковлик билан кузатишни ва улар етказган зарарни ўз вақтида аниқлашни режалаштирилмоқда.
