Фарғона вилоятининг Бешариқ туманида 90 дан ортиқ уйни сув босди. Бу ҳақда Фавқулодда вазиятлар вазирлиги хабар берди.
Маълум қилинишича, жорий йилнинг 1 май куни соат 21:41 да 112 тизими орқали Фарғона вилоятининг Бешариқ туманида кучли ёмғир ёғиши оқибатида туманнинг “Ворух Дашт”, “Янгиқўрғон” МФЙларнинг айрим кўчаларидаги 90 дан ортиқ аҳоли яшаш хонадонларининг томорқаларига ёмғир сувлари киргани тўғрисида Фарғона вилояти ФВБга хабар келиб тушган.
“Шу заҳотиёқ, ҳодиса жойига Фарғона вилояти ФВБ, вилоят ва туман ҳокимлиги вакиллари етиб бориб, ҳодиса оқибатларини бартараф этиш ишлари жадаллик билан амалга оширилмоқда”, дейилади хабарда.
Қайд этилишича, бартараф этиш ишларига барча зарур куч ва воситалар жалб қилинган. Вазият тўлиқ назоратга олинган. Ушбу ҳодиса оқибатида фуқаролар орасида тан-жароҳат олганлар йўқ.
“Мазкур вазиятни оқибатлари қисқа вақтда бартараф этилади”, дейилади хабарда.
