Кеча, 19 май куни Қашқадарё вилоятининг Деҳқонобод туманида кучли сел келиши оқибатида 25 ёшли йигит ҳалок бўлди. Бу ҳақда Бош прокуратура матбуот котиби Ҳаёт Шамсутдинов маълум қилди.
Маълум бўлишича, соат 20:20 да Деҳқонобод тумани Ички ишлар бўлимига “Янги ҳаёт” МФЙ Қурилиш қишлоғидаги дарёдан сел келиши оқибатида нотаниш эркак жинсига мансуб мурда оқиб келгани ҳақида хабар тушган. Терговга қадар текширув ҳаракатлари давомида аниқланишича, марҳум Ш.О. соат 15:00 ларда қўйларини боқиш учун кетган, бироқ 18:00 га қадар қайтиб келмаган. Ўша вақтда қишлоқда қаттиқ ёмғир ёғиб, сел келган. Бир қанча вақтдан сўнг Ш.О. нинг мурдаси дарёдаги сел билан бирга оқиб келган. Шундан сўнг у яшаш хонадонига олиб борилган.
Билдирилишича, ҳолат юзасидан туман прокуратураси томонидан терговга қадар текширув ҳаракатлари олиб борилмоқда. Текширув якунига кўра қонуний қарор қабул қилиниши таъминланади.
