АҚШ Президенти Дональд Трамп, агар делегациялар бўлажак музокараларда муваффақиятга эришса, Эрон раҳбарияти билан учрашишга тайёрлигини билдирди. Бу ҳақда у “The New York Post” нашрига берган интервьюсида сўз очди.
Нашрнинг ёзишича, Трамп АҚШ ва Эрон ўртасидаги музокаралар муваффақиятсизликка учраши мумкинлиги ҳақидаги тахминларни “бир четга суриб қўйган”. Оқ уй раҳбарининг сўзларига кўра, Америка делегацияси аллақачон Исломободга йўл олган. Делегация таркибидан вице-президент Жей Ди Вэнс, махсус вакил Стив Виткофф ва маслаҳатчи Жаред Кушнер жой олган.
“Улар ҳозир у ерга йўл олишмоқда. Исломобод вақти билан бугун оқшом ўша ерда бўлишади”, дейди АҚШ Президенти.
Мақолада айтилишича, Трамп агар имконият туғилса, Ислом Республикаси раҳбарияти билан тўғридан тўғри учрашишдек “радикал дипломатик қадам”га тайёрлигини тушунтирган.
“Улар билан учрашиш мен учун муаммо эмас. Агар улар учрашишни хоҳлашса, бизда жуда қобилиятли одамлар бор – мен улар билан кўришишга қарши эмасман”, дейди Трамп.
Бироқ у бунинг учун Эрон ядро қуролини яратишга бўлган ҳар қандай уринишдан воз кечиши кераклигини таъкидлаган. Бундан ташқари, АҚШ раҳбари Эрон “талабларга риоя қилса, гуллаб-яшнаш салоҳиятига эга” эканини қўшимча қилган.
Эслатиб ўтамиз, аввалроқ Дональд Трамп блокадани ёриб ўтмоқчи бўлган Эрон кемасига ҳужум қилингани ҳақида хабар берган эди. У денгиз пиёдалари кемани назорат остига олганини айтган. Эрон эса бунга жавоб чораларини эълон қилган.
Кейинчалик АҚШ Марказий қўмондонлиги (CENTCOM) Эрон танкерини қўлга олиш акс этган кадрларни эълон қилди – видео идоранинг Х ижтимоий тармоғидаги расмий аккаунтида тарқатилди.
