Қашқадарё вилояти Кўкдала туманида лолазорни автомобилда пайҳон қилган ҳайдовчи 15 суткага қамалди. Бу ҳақда ИИВ Жамоат хавфсизлиги департаменти ахборот хизмати хабар берди.
Маълум қилинишича, ҳолат акс этган видео қайта таҳлил қилиниб, ундаги ҳаракатларда Маъмурий жавобгарлик тўғрисидаги кодекснинг 183-моддасида назарда тутилган ҳуқуқбузарлик аломатлари аниқланган.
Профилактика инспекторлари томонидан материаллар расмийлаштирилиб, иш судга юборилган. Суд қарорига кўра, 1996 йилда туғилган фуқаро Э.А. 15 суткага маъмурий қамоққа олинди.
Мазкур ҳаракатлар оқибатида табиатга 6 миллион 592 минг сўм миқдорида зарар етказилгани аниқланганди. Шунингдек, уч нафар ҳуқуқбузарнинг ҳар бирига базавий ҳисоблаш миқдорининг 50 бараваридан — 20 миллион 600 минг сўмдан, жами 61 миллион 800 минг сўм жарима тайинланган.
Ҳуқуқбузарликни содир этган шахслар белгиланган тартибда аниқланиб, уларга тегишли транспорт воситалари жарима майдончасига жойлаштирилган. Ҳуқуқбузарлар жарима ва етказилган зарарни тўлиқ қоплаши белгиланган.
