АҚШ президенти маъмурияти Бирлашган Араб Амирликлари, Кувайт ва Иорданияга 23 миллиард долларлик қурол сотиш бўйича келишув таклифини берди. Бу ҳақда вазиятдан хабардор АҚШ расмийларига таяниб, The Wall Street Journal маълум қилди.
Америка расмийларига кўра, бу қадам Эрон билан можаро фонида мазкур мамлакатларни ҳарбий жиҳатдан қўллаб-қувватлашга қаратилган. Таклиф этилаётган пакет таркибига Давлат департаменти эълон қилган 16 миллиард доллардан ортиқ битимлар киради. Улар орасида БАА учун ҳаво мудофаа тизимлари, бомбалар, радарлар, шунингдек, Кувайт учун 8 миллиард долларлик ҳаво ҳужумидан мудофаа тизимлари мавжуд.
Бундан ташқари, маъмурият БАА учун тахминан 7 миллиард долларлик қурол-яроғ савдосини ҳам маъқуллади. Бу битимлар АҚШ қонунларига кўра оммага эълон қилиниши шарт эмас, чунки улар аввал тузилган шартномаларни кенгайтиради.
Эълон қилинмаган ушбу келишувлар таркибида БААга 5,6 миллиард долларлик Patriot PAC-3 ракеталари ва 1,32 миллиард долларлик Ч-47 Chinook вертолётларини етказиб бериш кўзда тутилган. Шунингдек, 37 миллион долларлик Predator XP дронларини сотиш ва B-250/350 енгил самолётларига техник хизмат кўрсатиш дастурлари ҳам тасдиқланган.
Расмийларга кўра, Трамп маъмурияти Эрон ҳужумларига дуч келаётган Яқин Шарқдаги иттифоқчиларни қўллаб-қувватлаш учун қурол сотиш таклифларини илгари сурмоқда. Баъзи битимлар АҚШ қурол экспорти қонунидаги “фавқулодда банд” асосида амалга оширилади. Бу одатда йирик савдоларни кўриб чиқадиган Конгресс назоратини четлаб ўтиш имконини беради.
Шунингдек, битим доирасида БААда жойлашган ТHAAD мудофаа тизимига интеграция қилинадиган, тахминий қиймати 4,5 миллиард доллар бўлган радар ва бошқа ускуналар етказиб берилади.
“Ушбу савдо БААнинг мавжуд ва келажакдаги таҳдидларга қарши туриш салоҳиятини сезиларли даражада оширади”, дея таъкидлади Давлат департаменти.
Шунингдек, департамент Иордания учун 70,5 миллион долларлик авиация, ўқ-дорилар ва тегишли техник ускуналарни етказиб беришни ҳам маъқуллаган.
