Давлат хавфсизлик хизмати ва Иқтисодий жиноятларга қарши курашиш департаменти ходимлари ҳамкорлигида Бухоро вилоятида ўтказилган тезкор тадбирда қалбаки дори воситалари савдоси билан шуғулланиб келган шахслар фаолиятига чек қўйилди.
Хусусан, Ғиждувон туманида яшовчи, 1994 йилда туғилган фуқаро ўз оила аъзолари билан биргаликда, уй шароитида қўлбола усулда дори воситаларини тайёрлаб келаётгани маълум бўлди.
Қонунбузарлар томонидан дори воситаларини сақлаш учун 1 та манзил ва реализация қилиш учун 2 та дорихонадан фойдаланилаётгани аниқланиб, улар тегишли тартибда кўздан кечирилди.
Натижада ушбу манзиллардан жами 193 турдаги 47 821 дона, умумий тахминий қиймати 500 млн сўмдан ортиқ бўлган, контрабанда йўли билан олиб келинган ва қўлбола усулда тайёрланган дори воситалари, шунингдек, 6 989 дона дори воситаларининг бўш қутилари, ёрлиқлар, 3 дона дориларни қадоқлаш ускунаси ва 2 қоп йўриқномалар сақланиб келинаётгани аниқланиб, процессуал тартибда расмийлаштириб олинган.
Мазкур дори воситалари “Фармацевтика маҳсулотлари хавфсизлиги маркази” ДМга расмий хулоса олиш учун юборилди.
Ҳозирда ҳолат юзасидан терговга қадар текширув ҳаракатлари амалга оширилмоқда.
