Андижонда Ички ишлар бошқармаси ходими ва университет менежери пора олаётган вақтида қўлга олинди. Бу ҳақда Ички ишлар вазирлиги хабар қилди.
Қайд этилишича, бошқарма ходими синов имтиҳонларидан курсдоши паст баҳолар олганлигини билиб, декан орқали имтиҳонларни қайта топширмасдан туриб, яхши баҳолар қўйдириб бериши эвазига 2 миллион 700 минг сўм пулларни талаб қилган. Унинг курсдоши эса ходимнинг хатти-ҳаракатлари бўйича Шахсий хавфсизлик бош бошқармасига мурожаат қилган.
Сафдор ходим пулларни курсдошидан олаётган вақтида ушланди. У тезкор тадбирнинг давом эттирилишини сўраб, бу ишда яна бир фуқаро, яъни баҳоларни қўйдириб беришни айтган 2001-йилда туғилган, университетда менежер бўлиб ишлайдиган шахс ҳам борлигини маълум қилган.
Университет ходими ҳам 2 миллион 500 минг сўм миқдоридаги пулларни олаётган вақтида тадбир иштирокчилари томонидан далилий ашёлар билан қўлга тушди.
