Сербия президенти Александр Вучич мамлакатда келаси йилнинг баҳорида дронлар ишлаб чиқарувчи илк йирик завод фаолият бошлашини эълон қилди. Бу ҳақда давлат раҳбари Мудофаа вазирлиги ва Қуролли кучлар Бош штабининг янги мажмуаси учун тамал тоши қўйиш маросимида маълум қилди.
“Юқори технологияли дронлар ўзимизда ишлаб чиқарилади”
Вучичнинг сўзларига кўра, ишлаб чиқариш жараёни тўлиқ Сербия ҳудудида ташкил этилади.
“Март ойининг охири, узоғи билан апрель ойи бошида мамлакатимиздаги биринчи йирик дрон заводи очилиши кутилмоқда. Шуни ғурур билан айта оламанки, юқори технологияли дронлар ишлаб чиқарилади”, деди Сербия президенти.
Шунингдек, у мамлакат кўплаб учувчисиз учиш аппаратлари ва камикадзе-дронларни харид қилаётганини ҳамда ушбу жараён давом этишини таъкидлади.
Европа ва Россия ўртасидаги эҳтимолий урушга тайёргарлик
Президент жаҳондаги геосиёсий вазиятдан “ниҳоятда хавотирда” эканини яширмади. Унинг қайд этишича, тинчликни сақлаш Сербия учун устувор вазифа бўлса-да, мамлакат ҳар қандай чақириқларга тайёр туриши лозим. Вучич ноябрь ойида Сербия ҳам “бошқалар каби” Европа ва Россия ўртасидаги эҳтимолий урушга тайёргарлик кўраётганини, чунки бундай хавф “тобора яққол намоён бўлаётгани”ни айтиб ўтган эди. Шу сабабли республика ўз армиясини кучайтиришга мажбурлиги қайд этилди.
Маълумот учун, 2025-йилнинг март ойида Европа комиссияси раҳбари Урсула фон дер Ляйен Европа Иттифоқини қайта қуроллантириш бўйича 800 миллиард евролик режани тақдим этган эди. Айни пайтда, Россия президенти Владимир Путин Европада йирик уруш бошланиши ҳақидаги даъволарни “ёлғон ва сафсата” деб атаб, европалик сиёсатчиларни васвасага тушаётганликда айблаган.
