Бугун, 2 июнь куни Канаданинг Эдмонтон шаҳрида Ўзбекистон ва Канада терма жамоалари ўртасида ўртоқлик учрашуви бўлиб ўтди. Унда Ўзбекистон миллий терма жамоаси 0:2 ҳисобида мағлубиятга учради.
Учрашувнинг дастлабки бўлимида Элдор Шомуродовда бир нечта голли вазиятлар юзага келди, аммо Элдор улардан фойдалана олмади. 23-дақиқада эса Ўзбекистон терма жамоаси ярим ҳимоячиси Азиз Ғаниев жароҳат олиб, майдонни тарк этди. Шу тариқа биринчи бўлим 0:0 ҳисобида якунланди.
Иккинчи бўлимда мезбонлар ташаббусни қўлга олди. 58-дақиқада Жонатан Осорио ҳисобни очди. Учрашувга қўшиб берилган вақтнинг сўнгги дақиқаларида Жалден Нелсон Канаданинг иккинчи голини урди. Қолган вақтда ҳисоб ўзгармади ва Ўзбекистон терма жамоаси Жаҳон чемпионати олдидан ўтказилган илк ўртоқлик учрашувида мағлуб бўлди.
Ўзбекистон миллий терма жамоаси жорий йилнинг 26 май куни Тошкентдан Нью-Йоркка тўғридан-тўғри авиақатнов орқали АҚШга етиб борган эди. Фабио Каннаваро бошчилигидаги жамоа Жаҳон чемпионатидаги дебюти олдидан икки ўртоқлик учрашуви ўтказиши режалаштирилган.
Канадага қарши баҳсдан сўнг Ўзбекистон терма жамоаси жорий йилнинг 8 июнь куни Нью-Йорк шаҳрида Нидерландия терма жамоасига қарши майдонга тушади.
Эслатиб ўтамиз, аввалроқ Ўзбекистон терма жамоасининг Жаҳон чемпионати учун кенгайтирилган 30 кишилик таркиби эълон қилинган эди.
