Халқаро ҳамкорлик натижасида қидирувда бўлган Ўзбекистон фуқаролари Баҳрайн қироллиги ҳамда АҚШдан мамлакатга экстрадиция ва депортация қилинди. Бу ҳақда Ички ишлар вазирлиги ахборот хизмати хабар берди.
Маълум қилинишича, Интерполнинг Тошкент ва Манамадаги Миллий марказий бюролари ўртасидаги яқин ҳамкорлик натижасида Ўзбекистон ҳуқуқни муҳофаза қилиш органлари ташаббуси билан фирибгарлик содир этгани учун халқаро қидирувда бўлган фуқаро Баҳрайн қироллигидан Ўзбекистонга экстрадиция қилинган.
Экстрадиция икки давлатнинг ваколатли идоралари томонидан олиб борилган мувофиқлаштирилган ишлар ҳамда Интерполнинг халқаро полиция ҳамкорлиги каналларидан самарали фойдаланиш натижасида амалга оширилган.
Шунингдек, Қўшма Штатлар элчихонаси билан ҳамкорликда Интерполнинг Ўзбекистондаги Миллий марказий бюросини ахборот билан таъминлаш доирасида ўтказилган қўшма тезкор-қидирув тадбирлари натижасида ички ишлар органлари томонидан ўта йирик миқдордаги ўғирлик содир этганликда гумон қилиниб қидирувда бўлган яна бир Ўзбекистон фуқароси мамлакатга депортация қилинди.
Томонлар ўртасида ўтказилган музокаралар, ҳамкорликдаги тезкор ҳаракатлар ва ахборот алмашинуви натижасида АҚШнинг ваколатли органлари қидирувдаги шахсни Ўзбекистонга чиқариб юбориш тўғрисида қарор қабул қилган.
