Наманган вилоятининг икки туманидаги Мактабгача ва мактаб таълими бошқармасида коррупцион ҳаракатлар амалга оширгани учун туман шўба бошлиғи ҳамда ходими қўлга олинди. Бу ҳақда Давлат хавфсизлик хизмати хабар берди.
Қайд этилишича, ДХХ ва Бош прокуратура ҳузуридаги Иқтисодий жиноятларга қарши курашиш департаменти ҳамкорлигида ўтказилган тезкор тадбирда Наманган вилояти Мактабгача ва мактаб таълими бошқармасининг шўба бошлиғи Тўрақўрғон туманида яшовчи фуқарони Наманган шаҳридаги умумий ўрта таълим мактабларидан бирига директор лавозимига ишга жойлаштириб қўйиш эвазига 10 000 АҚШ доллари талаб қилган. У сўралган пул маблағи ҳисобидан 8 500 АҚШ долларини ўз хизмат хонасида олган вақтида ашёвий далиллар билан ушланган.
Аниқланишича, ушбу мансабдор шахс 2011 йилда Жиноят Кодексининг 168-, 205-, 209-, 210- ва 227-моддалари (фирибгарлик, ҳокимият ёки мансаб ваколатини суиистеъмол қилиш, мансаб сохтакорлиги, пора олиш, ҳужжатлар, штамплар, муҳрлар, бланкаларни … эгаллаш, нобуд қилиш, уларга шикаст етказиш ёки уларни яшириш) билан судланган бўлсада, ўз хатосидан тўғри хулоса чиқармаган.
Шунингдек, бошқа бир ҳолатда Наманган шаҳридаги мактабгача таълим ташкилоти ходими давлат хусусий шерикчилигида 2 та мактабгача таълим ташкилоти ташкил этмоқчи бўлган тадбиркорга ўзининг мансабдор танишлари орқали мазкур туман Мактабгача ва мактаб таълими бўлими томонидан тегишли шартномаларни тасдиқлатиб бериш эвазига 2 000 АҚШ доллари олган вақтида ушланган. Сўнгра тезкор тадбир давом эттирилиб, ундан ушбу пул маблағини олганида Давлатобод тумани Мактабгача ва мактаб таълими бўлими бош мутахассисининг ноқонуний ҳаракатига чек қўйилган.
Билдирилишича, ҳозирда ҳар икки ҳолат бўйича мазкур шахсларга нисбатан жиноят ишлари қўзғатилиб, тергов ҳаракатлари олиб борилмоқда.
