Буюк Британия Россияга қарши санкцияларини кенгайтириб, “қора рўйхат”га 10 нафар жисмоний шахс ва 8 та компанияни киритди. Бу ҳақда мамлакат Ташқи ишлар вазирлиги эълон қилган ҳужжатда келтирилган.
Қайд этилишича, рўйхатга Камерун, Хитой ва Таиландда рўйхатдан ўтган компаниялар ҳам киритилган. Бундан ташқари, яна 17 та компания ва жисмоний шахсларга нисбатан ҳам чекловлар жорий этилган.
Жумладан, санкциялар Россия компаниялари “Элтех Компонент” ва “СНК Трейд”га, шунингдек Хитойда рўйхатдан ўтган M9 Logistics Ltd ва M9 Logistics Co, Таиланднинг Sea 2 Sky ва Canopus Trading Group, Tanaq компанияси ҳамда Камерундаги Enangue Holding компаниясига нисбатан қўлланилади.
Жисмоний шахслар орасида Элмир Сайфуллин, Чулпан Исламова, Савсан Юсупова, Сергей Кащенко, Михаил Воловик, Егор Никитин, Анастасия Баришева, Константин Трифонов, Павел Никитин ҳамда Франция ва Камерун фуқароси Мишель Гай Атеба бор.
Санкциялар доирасида Британия банкларида ушбу компанияларга тегишли ҳисоблар аниқланса, улар музлатиб қўйилади. Шунингдек, рўйхатга киритилган жисмоний шахсларга мамлакат ҳудудига кириш тақиқланади.
