Бельгиянинг Женап шаҳрида жойлашган “Наполеоннинг сўнгги қароргоҳи” музейи 17 декабрь чоршанба куни кечқурун нома`лум шахслар томонидан талон-тарож қилинди. Бу ҳақда RTBF телеканали хабар бермоқда.
Телерадиокомпания маълумотларига кўра, икки жиноятчи бинога дераза орқали кириб олган. Улар ичкарига киргач, бир нечта витриналарни синдириб, ундаги нарсаларни олишган. Натижада коллекциядаги буюмлар, жумладан, тарихан Наполеон билан боғлиқ бўлган бешта олмос билан безатилган 18 каратли олтин узук ўғирланган. Ушбу узук 1815 йил 18 июнда Ватерлоо жангида императорнинг мағлубиятидан сўнг топилгани айтилади. Шунингдек, ўғирланганлар орасида Наполеон даврида зарб қилинган олтин ва кумуш тангалар ҳам бор.
Ўғирланган буюмларнинг бозор қиймати ҳақида маълумот берилмаган. Ҳолат бўйича полицияга мурожаат қилинган. Валлон Брабант прокуратураси воқеа юзасидан тергов ишларини бошлаган.
Октябрь ойида номаълум шахслар Лувр музейига бостириб кириб, Наполеон коллекциясидан қимматбаҳо буюмларни ўғирлаб кетишган. Жиноятчиларга ўғирликни амалга ошириш учун атиги етти дақиқа кифоя қилган. Ўғирланган тақинчоқларнинг қиймати 88 миллион еврога баҳоланган.
