Жиззах шаҳри ҳудудида ўтказилган тезкор тадбир давомида фуқароларга ҳайдовчилик гувоҳномасини олиб беришни ваъда қилиб, пул талаб қилган шахс қўлга олинди. Бу ҳақда Ички ишлар вазирлиги хабар қилди.
Маълум қилинишича, 1995 йилда Жиззах шаҳрида туғилган, хусусий тадбиркор сифатида фаолият юритувчи шахс фуқароларнинг ишончига кириб, уларга автомактабларда ўқиганлиги ҳақидаги ҳужжатларни расмийлаштириб беришини айтган, ҳатто ўқув машғулотларида қатнашмаган бўлса ҳам тегишли ҳужжатларни тайёрлаб, танишлари орқали ҳайдовчилик гувоҳномаси олишда ёрдам беришни ваъда қилган. У мазкур хизмат эвазига бир фуқародан олдиндан 10 миллион сўм пул талаб қилган. Тезкор тадбир давомида у Жиззах шаҳри “Ўратепалик” маҳалласида жойлашган ошхона олдида келишилган пул маблағини олаётган вақтда ҳуқуқни муҳофаза қилувчи органлар ходимлари томонидан ашёвий далиллар билан ушланган.
Тергов ҳаракатлари давомида аниқланишича, ушбу шахс муқаддам Жиноят кодексининг 169-моддаси (ўғрилик) билан жиноий жавобгарликка тортилган бўлиб, суд томонидан жазоланган.
Ҳозирда мазкур ҳолат юзасидан Иқтисодий жиноятларга қарши курашиш департаментининг Дўстлик тумани бўлими томонидан Жиноят кодексининг 168-моддаси (фирибгарлик) биринчи қисми ва 211-моддаси (пора бериш) тегишли қисмлари билан жиноят иши қўзғатилиб, тергов ҳаракатлари олиб борилмоқда.
