Франциянинг машҳур Лувр музейи ўтган ҳафтадаги ўғрилик воқеасидан сўнг ўзининг энг қимматбаҳо заргарлик буюмларининг бир қисмини Франция банкига топширди. Бу ҳақда Reuters хабар берди.
Маҳаллий ҳукуматнинг маълум қилишича , музейнинг Аполлон галереяси — яъни Франция қироллик тожига оид дурдоналар сақланадиган бўлимдаги айрим буюмлар — 24 октябрь куни полиция кузатуви остида банкка кўчириб ўтказилган.
Франция банки мамлакатнинг олтин захираларини ер остида, 27 метр чуқурликдаги улкан омборхонасида сақлайди. У Сена дарёсининг ўнг соҳилида, Луврдан атиги 500 метр нарида жойлашган. Лувр ҳам, Франция банки ҳам бу ҳақда расмий баёнот е’лон қилмаган.
Номаълум шахслар 19 октябрь куни музей коллекциясидан тахминан 102 миллион долларлик саккизта қимматбаҳо буюмни ўғирлаб кетган. Улар иш вақтида кран ёрдамида музейнинг юқори қаватидаги ойнани синдириб кирган ва ўғирликдан сўнг мототциклларда қочиб кетган.
Мазкур ўғрилик атиги 4 дақиқада амалга оширилган. Жиноятчилар музейга ходим формасида ташриф буюрган. Жиноят бутун дунё бўйлаб катта шов-шувга сабаб бўлди. Францияда эса кўплаб фуқаролар ва мутахассислар бу ҳолатни миллий шармандалик сифатида баҳоламоқда.
