Франция ҳарбий-денгиз кучлари 22 январь куни Ўрта Ер денгизида Россиядан келаётган ва халқаро санкциялар остида бўлган Гринч нефть танкерини қўлга олди. Бу ҳақда Франция президенти Эммануэл Макрон ўзининг X (собиқ Twitter) даги саҳифасида маълум қилди.
Макронинг сўзларига кўра, операция Россиянинг Украинага қарши урушини молиялаштиришга ҳисса қўшаётган “соядаги флот” фаолиятини тўхтатиш бўйича ҳаракатнинг бир қисми ҳисобланади. Франция ҳарбий амалдорлари анонимлик шарти билан операция Буюк Британия кўмагида амалга оширилганини маълум қилди. Улар кемани қўлга олиш имконини берувчи разведка маълумотларини Францияга тақдим этган.
Танкер Комор ороллари байроғи остида ҳаракатланган, унинг экипажи эса Ҳиндистон фуқаролари ҳисобаланди. Кема сохта байроқ остида сузганликда гумон қилинмоқда ва ҳозирда француз ҳарбийлари томонидан кейинги текширувлар учун портга олиб кетилган.
“Бу Бирлашган Миллатлар Ташкилотининг Денгиз ҳуқуқи тўғрисидаги конвенциясига қатъий риоя қилган ҳолда амалга оширилди.<…> Биз халқаро ҳуқуқ нормаларига риоя қилиш ва санкцияларнинг самарали қўлланилишини таъминлашга қатъий қарор қилдик”, деди Макрон. У танкер қўлга олинганидан кейин суд тергови бошланганини айтди.
21 январь куни Кариб денгизида АҚШ ҳарбийлари санкция остидаги нефтьни олиб кетаётган Сагитта танкерини қўлга олганди. Ушбу кема 2025 йил декабридан бери Венесуэлага нисбатан жорий этилган “карантин” режимини бузилишининг олдини олиш мақсадида АҚШ томонидан ушланган еттинчи танкер бўлди. Сагитта Россиянинг Украинага кенг кўламли босқини туфайли АҚШ, Европа Иттифоқи ва Буюк Британия санкциялари остида эди.
