Россия ҳукумати 2025 йил Ҳиндистон ва Бангладеш фуқароларига сўнгги тўққиз йил ичида рекорд миқдордаги ишлаш учун рухсатномалар берди. Бу ҳақда Ички Ишлар вазирлиги статистикасига таяниб, “Верстка” хабар берди.
Маълум қилинишича, Россияда ишлаш учун 56,5 минг нафар ҳиндистонлик фуқаро таклиф этилган, 2024 йил бу кўрсаткич 36,2 минг нафарни ташкил этганди. Шунингдек, Бангладешдан келганлар сони 2024 йилдаги 2,8 минг кишидан 9,3 минг кишига ошган. Иккала кўрсаткич ҳам 2017 йилдан буён кузатилган энг юқори натижа ҳисобланади.
Марказий Осиё бўйича кўрсаткичлар
Туркманистон фуқаролари учун ишлаш рухсатномалари сони 2,5 баробардан кўпроқ (25 минггача), Ўзбекистон фуқаролари учун беш баравар (2,3 минггача) ва Тожикистон фуқаролари учун деярли 3 баравар (263 тагача) кўпайган. Шунингдек, Россияда ишлашга рухсат берилган Хитой фуқаролари сони тахминан 50 фоизга (92 минггача) ошган.
2025-йилда чет элликларга берилган меҳнат рухсатномалари сони 240 мингтага етиб, 2017 йилдан бери энг юқори кўрсаткични қайд этди. Йил давомида бу кўрсаткич деярли 42 фоизга ўсган.
2026-йилда ҳукумат Ҳиндистон, Хитой, Малайзия, Бангладеш ва Африка мамлакатларидан кўпроқ меҳнат муҳожирларини жалб қилишни режалаштирмоқда. Меҳнат вазирлиги қарорига кўра, улар учун квотани 279 минг киши даражасида белгилаш мўлжалланмоқда.
Вазирлик маълумотларига кўра, 2026-йилдаги умумий квотанинг 92 фоизи саноат корхоналари ва йирик инфратузилма лойиҳалари учун малакали ишчиларга ажратилади. Қолган қисми эса оғир меҳнат шароитида ишловчи малакасиз ишчилар ҳамда айрим бошқа касблар (масалан, ветеринария санитарлари ёки ҳайвон парваришловчилар)дан иборат бўлади.
Аввалроқ Россия бош вазири ўринбосари Денис Мантуров мамлакат Ҳиндистондан келадиган меҳнат муҳожирларини чекланмаган миқдорда қабул қила олишини, бу ишчи кучи танқислигини бартараф этишини айтганди. Меҳнат ресурслари етишмаслиги Украинадаги уруш билан боғлиқ: 300 минг киши сафарбар этилиб фронтга юборилди, қарийб 1 миллион киши Мудофаа вазирлиги билан шартнома тузиб жангга кетди.
