Қозоғистон Бош прокуратураси ва Интерпол миллий марказий бюроси ходимлари, Қозоғистон Ташқи ишлар вазирлиги кўмаги билан инсон органлари савдоси бўйича трансмиллий тармоққа алоқадорликда гумон қилинаётган Украина фуқароси Польшадан Қозоғистонга экстрадиция қилинди. Тергов маълумотларига кўра, ушбу схема орқали ўнлаб ноқонуний трансплантациялар амалга оширилган. Бу ҳақда Қозоғистон Бош прокуратураси хабар берди.
Қайд этилишича, мазкур украиналик аёл беш йилдан ортиқ вақт давомида халқаро қидирувда бўлган. Маълумотларга кўра, у 2017-2018 йилларда инсон органларини ноқонуний олиб-сотиш билан шуғулланган трансмиллий уюшган жиноят гуруҳининг аъзоси бўлган.
Билдирилишича, гумондор жиноят занжиридаги асосий вазифалардан бирини бажариб келган. У потенциал донорлар ва реципиентларни излаш, уларнинг учрашувларини ташкил қилиш, махфийликни таъминлаш, шунингдек, органларни ноқонуний сотиб олиш ва кейинчалик трансплантация қилиш операцияларини мувофиқлаштириш ва қўллаб-қувватлаш каби муҳим ишлар билан шуғулланган.
Гуруҳ аъзолари нафақат Қозоғистонда, балки Ўзбекистон, Озарбайжон, Арманистон, Украина, Қирғизистон, Тожикистон ва Таиландда ҳам фаолият юритган. Улар жами 56 та тирик шахслардан олинган органларни ноқонуний савдога чиқариш операциясини амалга оширган.
Хабарда келтирилишича, мазкур шахс жорий йилнинг март ойида Польша чегарасини кесиб ўтишга уринганида қўлга олинган. Қозоғистоннинг сўрови асосида Польша томони аёлни экстрадиция қилишга қарор қилган.
Ҳозирда у Қозоғистондаги тергов изоляторида сақланмоқда. Мамлакат қонунчилигига мувофиқ, гумонланувчига 8 дан 12 йилгача озодликдан маҳрум қилиш ва мол-мулкни мусодара қилиш жазоси тайинланиши мумкин.
