Стриминг гиганти саналган Netflix йирик битим доирасида Warner Bros Discovery компаниясини 72 миллиард долларга сотиб олишга рози бўлди. Ҳар икки компания директорлар кенгаши ушбу келишувни бир овоздан маъқуллади. Бу ҳақда BBC хабар берди.
Ушбу узоқ давом этган курашда стриминг гиганти Netflix рақиблари Comcast ва Paramount Скйданcеъни ортда қолдириб, Warner Bros’ни сотиб олиш бўйича муваффақиятга эришди. Маълумот ўрнида, Warner Bros ўзининг “Гарри Поттер” ва “Тахтлар ўйини” каби франшизалари билан машҳур ҳамда HBO Мах стриминг хизматига эгалик қилади.
Келишув тафсилотлари ва кутилаётган натижалар
Мазкур харид кўнгилочар саноатда янги улкан гигант компанияни яратиши кутилмоқда. Бироқ битим ҳали рақобатни назорат қилиш органлари томонидан тасдиқланиши лозим.
Netflix ҳамраиси Тед Сарандоснинг сўзларига кўра, Warner Bros фильмлари ва шоуларини стриминг платформасининг Stranger Things каби сериаллари билан бирлаштирилади.
“Томошабинларга улар севадиган нарсаларни кўпроқ тақдим этишимиз лозим. Бу кино асрининг кейинги даврини белгилашга ёрдам беради”, деган у.
Маълум қилинишича, Warner Bros томонидан суратга олинган фильмлар кинотеатрлардаги намойиши давом этади. Компаниянинг телекўрсатув студияси эса учинчи томонлар учун ҳам контент ишлаб чиқариши мумкин. Айни пайтда, Netflix ўз платформаси учун эксклюзив контент ишлаб чиқаришни сақлаб қолади.
Нақд пул ва акцияларни ўз ичига олган битимнинг умумий қиймати (компаниянинг қарзларини ва акцияларнинг қийматини ўз ичига олади) тахминан 82,7 миллиард долларни ташкил этади. Warner Bros’нинг соф қиймати ёки нақд пулдаги нархи эса 72 миллиард долларга тенг.
Кинематография саноатидаги баъзилар, жумладан, Америка Ёзувчилар гилдияси (Writers Guild of America) бу келишувни танқид қилиб, унинг ишчилар ва истеъмолчиларга салбий таъсир кўрсатишини таъкидламоқда. Netflix бош директори Тед Сарандос эса компания зарур тартибга солиш рухсатини олишига “жуда ишончи комил” эканини ва бу мақсадга интилаётганини билдирган.
