Россия газини Хитойга “Сибир кучи” қувури орқали етказиб бериш 2025 йилда тўртдан бир қисмга, “Марказий Осиё– Марказ” тизими орқали Ўзбекистонга етказиб бериш эса 30 фоизга ошди. Бу ҳақда Халқаро энергетика агентлигининг газ бозори бўйича ҳисоботида сўз борган.
“Россия газининг Хитойга “Сибир кучи” қувурлар тизими орқали экспорти 25 фоизга (ёки деярли 8 миллиард куб метрга) ошди ва 2025 йилда қарийб 39 миллиард куб метрга етди. Бундан ташқари, Россия “Марказий Осиё – Марказ” қувури орқали Ўзбекистонга етказиб беришни кўпайтиришда давом этди, бунинг натижасида ушбу йўналишдаги умумий экспорт ҳажми тахминан 30 фоизга ўсиб, 2025 йилда 7 миллиард куб метрдан ошди”, дейилади ҳисоботда.
Аввалроқ “Газпром” 2025 йил охирида биринчи марта Хитойга Европага қараганда кўпроқ газ етказиб бергани, бу ҳажм 38,8 миллиард куб метр ташкил этгани ҳақида хабар берган эди. Бундан ташқари, “Газпром” Қозоғистон, Ўзбекистон ва Қирғизистонга Россия газини етказиб беришни 22,2 фоизга, Грузияга эса 40,4 фоизга оширгани айтилганди.
“Сибир кучи” Россия шарқидаги энг йирик газ ташиш тизими бўлиб, газ қувурининг экспорт қуввати йилига 38 миллиард кубометр газни ташкил этади. “Газпром” ва Хитойнинг CNPC компанияси ўртасида 2014 йилда тузилган 30 йиллик шартномага кўра, Россия газини Хитойга шарқий йўналиш бўйича биринчи қувур орқали етказиб бериш 2019 йил декабрь ойида бошланган. Бутун муддат давомида етказиб беришнинг умумий ҳажми 1 триллион куб метрдан ошади, шартнома миқдори – 400 миллиард доллар.
“Газпром” раҳбари Алексей Миллернинг маълум қилишича, компания 2024 йил 1 декабрдан бошлаб “Сибир кучи” газ қувурини Хитойга йилига 38 миллиард куб метр газ етказиб бериш бўйича максимал лойиҳа қувватига олиб чиққан. “Сибир кучи” бўйича етказиб бериш 2025 йилда шартнома мажбуриятларидан қарийб 800 миллион куб метрга ошган.
