Тошкентда автобусда йўловчилар кўз ўнгида уятсиз ҳаракатлар қилган эркак 15 суткага қамалди. Бу ҳақда пойтахт ИИББ матбуот хизмати хабар берди.
Автобус салонида номаълум эркак кишининг жамиятда юриш-туриш қоидаларини бузганлигини акс этган видео тарқалиб турли муҳокамаларга сабаб бўлганди. Расмий маълумотга кўра, воқеа 3 июнь куни тахминан соат 09:45 ларда 42-йўналишда ҳаракатланувчи автобус салонида юз берган.
48 ёшли эркак Т.С. жамиятда юриш-туриш қоидаларини қасддан менсимасдан, жамоат жойида бўла туриб уятсиз ҳаракатлар содир этган. Кўрилган тезкор чора-тадбирлар натижасида ушбу фуқаро ички ишлар органлари ходимлари томонидан ушланган.
Мазкур ҳолат юзасидан Олмазор тумани ИИО ФМБ томонидан Т.С.га нисбатан Маъмурий жавобгарлик тўғрисидаги кодексининг 183-моддаси (майда безорилик), 194-моддаси (ички ишлар органлари ходимининг қонуний талабларини бажармаслик) аломатлари билан маъмурий баённома расмийлаштирилган.
Тўпланган ҳужжатлар қонуний чора кўриш учун Жиноят ишлари бўйича туман судига юборилган. Суд томонидан ушбу шахсга нисбатан 15 сутка маъмурий қамоқ жазоси тайинланган.
