Хитойнинг етакчи робот ишлаб чиқарувчиларидан бири – UBTech Robotics компанияси Хитой ва Вьетнам ўртасидаги чегара пунктларига ўз роботларини жойлаштиради. Одамсимон роботлар саёҳатчиларга ҳамроҳлик қилади, кўрикдан ўтказади, ҳудудни патруллайди ва логистика вазифаларини бажаради. Бу ҳақда “South China Morning Post” хабар берди.
Нашрнинг ёзишича, UBTech Robotics 37 миллион долларлик шартнома имзолаган. Унга кўра, роботлар Вьетнам билан чегарадош бўлган Гуанси автоном районидаги жанубий қирғоқ шаҳри Фанчэнганда жойлаштирилади. Лойиҳада Walker S2 моделидан фойдаланиш назарда тутилган. У дунёда батареясини мустақил равишда алмаштира оладиган биринчи одамсимон робот сифатида тақдим этилган.
Бундай инновация мамлакатдаги кенгроқ йўналишнинг бир қисми ҳисобланади. Хитойнинг робототехника саноати давлат сиёсати кўмагида сунъий интеллектни тижоратлаштиришга интилмоқда. Компаниялар билан бир қаторда, турли провинциялардаги давлат муассасалари ҳам кундалик иш жараёнларига роботларни тобора кўпроқ жорий қилмоқда.
Масалан, Хитойнинг шарқидаги Чжэцзян провинциясининг иммиграция хизмати ўз фаолиятига одамсимон роботлар ва Unitree Robotics компаниясининг 4 оёқли роботларини жорий этган. Идора вакилларининг айтишича, бу қурилмалар “такрорланувчи ва машаққатли кундалик вазифаларни бажариши” ҳамда “меҳнат ресурсларини тежашга ёрдам бериши” мумкин.
Хитой Марказий телевидениеси маълумотига кўра, Ханчжоудаги Сяошань халқаро аэропортида ҳам шунга ўхшаш робот йўловчиларнинг мурожаатларига жавоб бериш каби кундалик вазифаларни бажаришда фойдаланилган.
