Президент томонидан 13 августда имзоланган қонун билан Оила кодексининг 69-моддасига киритилган ўзгартиришларга, болага отанинг исми, ота ёки она томонидан миллий анъаналарга кўра бобонинг исми бўйича фамилия берилиши мумкинлиги белгиланди. Илгари кодексда отанинг исми фамилия сифатида берилиши назарда тутилмаган эди.
Бунга қадар боланинг фамилияси ота-онанинг фамилиясига қараб белгиланарди. Ота ёки она томонидан миллий анъаналарга кўра бобонинг исми ҳам фамилия қилиб берилиши мумкин эди.
Олий Мажлис Қонунчилик палатасининг 13 январдаги мажлисида депутат Нуъмон Муҳаммадиев ота исмини болага фамилия сифатида бериш имкониятининг мавжуд эмаслиги фуқароларнинг ҳақли эътирозларига сабаб бўлаётганини айтганди. 8 август куни сенаторлар отанинг исмини болага фамилия сифатида берилишининг қонунчиликда белгиланиши фуқароларга қўшимча қулайликлар яратиб, миллий ва диний анъаналарга мувофиқ уларнинг хоҳиш-истакларини рўёбга чиқаришга хизмат қилишини таъкидлаганди.
Қонун расмий эълон қилинган кундан эътиборан кучга кирди.
