Ўзбекистонда 2025-йилда 19 мингга яқин одам турли жиноятлар сабаб озодликдан маҳрум қилинди. Бу ҳақда Олий суд матбуот хизмати хабар қилди.
Қайд этилишича, ўтган йилда судлар томонидан 79 554 нафар шахсга нисбатан 63 177 та жиноят иши кўриб чиқилди. Бунда судланганлар 63 340 нафарни ташкил этиб, шундан 18 816 нафар шахсга озодликдан маҳрум қилиш ва 43 531 нафарига бошқа турдаги жазолар тайинланди, 993 нафар шахс шартли ҳукм қилинди.
Судланган шахсларнинг 55 829 нафари эркак, 7 511 нафари аёл, 23 973 нафари ёшлар (шу жумладан, 2 431 нафари вояга етмаган) ва 2 830 нафари 60 ёшдан ошган шахслар бўлишган. Шунингдек, 422 киши шахс оқланиб, реабилитация қилинди, ярашув институтлари натижасида эса 13 224 киши жиноий жавобгарликдан озод этилди.
Жиноят ишларининг салмоқли қисми Тошкент шаҳри, Фарғона, Тошкент, Самарқанд ва Наманган вилоятларида кўрилди.
Суд залидан озодликдан маҳрум этиш билан боғлиқ бўлмаган жазолар тайинланиши муносабати билан 8 085 нафар шахс озод қилиниб, 15 992 кишига асоссиз равишда қўйилган моддалар айбловдан чиқариб ташланди ёки қайта малакаланди. Кафолат хатлари асосида 86 нафар шахс, жумладан ёшлар, аёллар ва бошқаларга озодликдан маҳрум қилиш билан боғлиқ бўлмаган жазолар тайинланган.
Шу билан бирга, 35 572 нафар шахс жазони ўташдан муддатидан илгари шартли озод қилиниб, 11 421 нафар шахснинг жазоси енгилроғи билан алмаштирилди.
Кўрилган жиноят ишларнинг аксариятини:
- фирибгарлик;
- транспорт воситалари ҳаракати ёки улардан фойдаланиш хавфсизлиги қоидаларини бузиш;
- ўғрилик;
- гиёҳвандлик билан боғлиқ;
- ўзлаштириш ёки растрата йўли билан талон-торож қилиш;
- ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш;
- қўшмачилик қилиш ёки фоҳишахона сақлаш;
- тақиқланган экинларни етиштириш;
- қасддан баданга ўртача оғир шикаст етказиш билан боғлиқ жиноятлар ташкил этади.
Апелляция тартибида 340 нафар шахсга, кассацияда эса 379 кишига нисбатан биринчи инстансия судлари томонидан чиқарилган қарорлар бекор қилиниб, мос равишда 2 375 нафар шахсга ва 1 383 кишига нисбатан чиқарилган суд қарорлари ўзгартирилди. Тафтиш тартибида ҳам 173 нафар шахсга чиқарилган қарорлар бекор қилинди, 813 нафарига нисбатан ўзгартирилди.
Бундан ташқари, Олий суднинг Жиноят ишлари бўйича судлов ҳайъати томонидан тафтиш тартибида 1 072 кишининг иши кўрилиб, 213 кишига қуйи судлар томонидан чиқарилган қарорлар бекор қилиниб, 325 нафар шахсга нисбатан чиқарилган суд қарорлари ўзгартирилди.
