Астрономлар Сомон йўли шаклланишининг дастлабки босқичида қўшни йирик галактикани «ютиб юборгани»га оид янги далилларни аниқлади. Кашфиёт галактикамизнинг дастлабки ривожланиш тарихи ҳақидаги тасаввурларни ўзгартириши мумкин. Тадқиқот натижалари Nature Astronomy журналида эълон қилинди.
Аввалроқ олимлар Сомон йўли билан тўқнашган дастлабки йирик галактикалардан бири Gaia-Sausage-Enceladus бўлиб, бу ҳодиса тахминан 10 миллиард йил аввал содир бўлган, деб ҳисоблашар эди. Янги тадқиқот эса бундан ҳам қадимийроқ тўқнашув бўлганини кўрсатмоқда.
Болонья обсерваторияси олимлари бошчилигидаги халқаро тадқиқотчилар гуруҳи Hubble космик телескопи ёрдамида Сомон йўли марказига яқин жойлашган қадимий юлдуз тўдаларини ўрганди. Уларнинг ёши ва кимёвий таркиби таҳлил қилиниши натижасида бошқа юлдузлардан сезиларли фарқ қилувчи гуруҳ аниқланган.
Олимларнинг хулосасига кўра, бу юлдузлар LKH (Low-Energy Kraken-Heracles) деб номланган қадимий галактикага тегишли бўлган. Сомон йўли уни тахминан 11,8 миллиард йил аввал, Катта портлашдан қарийб икки миллиард йил ўтгач, ўзига қўшиб олган.
Ҳисоб-китобларга кўра, LKH галактикасидаги юлдузларнинг умумий массаси Қуёш массасидан тахминан 500 миллион марта катта бўлган. Ўша даврдаги ёш Сомон йўли учун бу жуда йирик қўшилиш бўлиб, унинг кейинги тузилиши ва ривожланишига сезиларли таъсир кўрсатган.
Тадқиқот Сомон йўли ўз тарихининг дастлабки даврлариданоқ нафақат янги юлдузлар ҳосил қилиш, балки бошқа галактикаларни ўзига қўшиб олиш ҳисобига ҳам катталашиб борганини кўрсатади.
