Кеча, 19 август куни Самарқанд вилоятининг Пастдарғом туманидаги автомобилларга техник хизмат кўрсатиш устахонасида Lacetti ва Foton русумли автомобиллар ёниб кетди. Бу ҳақда вилоят Фавқулодда вазиятлар бошқармаси хабар берди.
Маълум қилинишича, соат 17:49 да Пастдарғом тумани “Оқ Олтин” МФЙ ҳудудидан ўтувчи “Самарқанд – Каттақўрғон” автомобиль йўли ёқасидаги автомобилларга техник хизмат кўрсатиш устахонасида Lacetti ва Foton русумли автомобилларда ёнғин содир бўлгани тўғрисида вилоят Фавқулодда вазиятлар бошқармасига хабар келиб тушган.
Шунга кўра, ёнғин-қутқарув экипажлари зудлик билан воқеа жойига етиб бориб, ёнғинни қисқа фурсатда тўлиқ бартараф этгани қайд этилган.
Билдирилишича, ҳодиса оқибатида жабрланганлар йўқ. Ҳозирда ёнғиннинг келиб чиқиш сабаблари ва зарари аниқланмоқда.
