Саудия Арабистони Миср ва Сомали билан ҳарбий келишув устидаги ишларини якунлаш арафасида. Уларнинг коалицияси БААнинг минтақадаги таъсирини чеклаш учун тузилмоқда, дея ўз манбаларга таяниб хабар бермоқда Bloomberg агентлиги.
Қайд этилишича, яқин кунларда Сомали президенти Ҳасан Шайх Маҳмуд Қизил денгизда хавфсизлик соҳасидаги стратегик ҳамкорликни ривожлантириш ва давлатлар ўртасидаги ҳарбий шерикликни чуқурлаштириш бўйича шартномани имзолаш учун Саудия Арабистонига ташриф буюради.
Агентликнинг таъкидлашича, Саудия Арабистони доимо Сомалининг ҳудудий яхлитлигини ва унинг турли гуруҳларга қарши курашини қўллаб-қувватлаб келган, бироқ янги битим қиролликнинг ушбу Шарқий Африка мамлакатининг хавфсизлиги ва қуролли кучларини бевосита мустаҳкамлашга уринаётган биринчи ҳолати бўлади.
Сомали ҳукумати вакили келишув ишлаб чиқилаётганини тасдиқлаган, аммо бошқа изоҳ беришдан бош тортган. Саудия Арабистони ва Миср ҳукуматлари эса агентлик сўровларига жавоб бермаган.
БАА Африкадаги мавқейини мустаҳкамлаб, Могадишунинг ҳудудий яхлитлигини тан олган ҳолда Сомалидан ажралиб чиққан Сомалиленддаги Бербера ҳамда Пунтленд автономиясидаги Босасо портларига сармоя киритган. Натижада Сомали БАА билан хавфсизлик ва портлар бўйича келишувдан чиқди.
