Ўзбекистонда тадбиркорлар 1 ой ичида молиявий жариманинг 50 фоизини тўласа, қолган қисмини тўлашдан озод этилади. Бу ҳақда президентнинг 15 апрелдаги қарорида белгиланди.
“Молиявий жарималарни қўллаш тартибини янада либераллаштириш ва суд назорати самарадорлигини ошириш бўйича қўшимча чоралар тўғрисида”ги қарорга кўра, бу тартиб 2026 йил 1 октябрдан кучга киради. Шунингдек, тадбиркорларга молиявий жарима суммасини 6 ой давомида бўлиб-бўлиб тўлаш имконияти берилади. Бунинг учун тадбиркор жаримани тўлаш тўғрисидаги қарор топширилган кундан бошлаб 1 ой давомида жариманинг 1/6 қисмини тўласа, жаримани бўлиб-бўлиб тўлаш тартиби автоматик равишда амал қилади.
Агар суд томонидан жарима қарори бекор қилинса ёки ҳақиқий эмас деб топилса, олдин ундирилган маблағлар 15 кун ичида қайтарилади. Агар пул ўз вақтида қайтарилмаса, кечиктирилган ҳар бир кун учун Марказий банк асосий ставкасининг 300 дан бирига тенг миқдорида фоиз тўланади.
Молиявий жарималарнинг электрон реестри жорий этилади
2027 йил 1 январдан бошлаб Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил томонидан юритиладиган “Ягона давлат назорати” ахборот тизимида тадбиркорлик субъектларига нисбатан қўлланган молиявий жарималарнинг электрон реестри жорий этилади.
Бунда:
- ваколатли органларнинг молиявий жарималарни қўллаш тўғрисидаги қарорлари улар қабул қилинганидан сўнг уч иш кунида мажбурий тартибда ушбу электрон реестрга электрон рақамли имзо билан тасдиқланган ҳолда, мазкур жараён тўлиқ рақамлаштирилган ҳолларда эса бундай қарорлар ўзаро интеграциялашган ахборот тизимлари орқали автоматик равишда киритилади;
- электрон реестрга киритилмаган ва электрон рақамли имзо билан тасдиқланмаган қарорлар ҳақиқий эмас деб ҳисобланади ва улар асосида молиявий жарима ундирилмайди;
- электрон реестрда тадбиркорлик субъекти томонидан содир этилган қилмишнинг такрорийлигига оид маълумотлар базаси юритилади ва хавфни бошқариш тизими ёрдамида таҳлил қилиб борилади.
Судга онлайн шикоят бериш имконияти яратилади
2027 йил 1 апрелга қадар солиқ тўловчи — тадбиркорнинг шахсий кабинети орқали ваколатли органларнинг молиявий жаримани қўллаш тўғрисидаги қарорлари устидан судга онлайн шикоят бериш имконияти яратилади. Бунда иш юритувга қабул қилинган шикоятлар бўйича қарорларнинг ижросини тўхтатиб туриш ҳақида суд томонидан манфаатдор вазирлик ва идоралар автоматик равишда хабардор қилинади.
