Августда йил бошидан бери энг кўп мол гўшти импорт қилинди. Бу ҳақда Божхона қўмитаси эълон қилган рақамларда қайд этилган.
2026 йил август ойида Ўзбекистонга жами қиймати 85,6 млн долларлик 21 минг тонна мол гўшти импорт қилинди. Бу июлдагига нисбатан 3 минг тоннага (23,4 фоизга) кўп. Мазкур ўсиш йил бошидан бери кузатилган энг юқори кўрсаткич ҳисобалади.
Январь ойида хориждан 11,6 минг тонна, февралда 14,3 минг тонна, мартда 12,7 минг тонна гўшт импорти амалга оширилган. Ўз навбатида хориждан апрелда 11,2 минг тонна, майда 9,3 минг тонна, июнда 12,9 минг тонна маҳсулот харид қилинган.
Умумий олганда, жорий йил январь-август ойларида мамлакатга жами қиймати 519 млн долларлик 111,1 минг тонна мол гўшти импорт қилинди. Мазкур кўрсаткич 2025 йил мос давридагига нисбатан 21 минг тоннага ўсган.
Ҳозирда Ўзбекистонда гўштга бўлган йиллик талаб 2,1 миллион тоннадан ортиқни ташкил этади. Маҳсулот ишлаб чиқариш ҳажми эса 1,6 миллион тонна. Шу боис ҳукумат чорвачилик тармоғини ривожлантириш учун 463 миллион доллар йўналтиришни режалаштирган. Соҳага қатор имтиёзлар бериш ва уни қўллаб-қувватлаш чорлари эълон қилинган.
Аввалроқ масъулларга 2026 йил якунигача четдан 100 минг бош қорамол олиб келиш вазифаси қўйилганди.
