Ўзбекистон ва Мўғулистон истиқболли уран конларида геология-қидирув ишларини олиб боришга келишиб олди, деб хабар берди Навоийуран давлат корхонаси ахборот хизмати.
Маълумотларга кўра, Навоийуран ва Uzbek Overseas Geology Company делегацияси Мўғулистонга амалий ташриф билан бориб, Моn Аtоn давлат компанияси вакиллари билан музокаралар ўтказган. Учрашувда томонлар 2026 йилда Мўғулистондаги истиқболли уран конларида геология-қидирув ишларини олиб бориш масалаларини муҳокама қилди.
Томонлар Uzbek Overseas Geology Company ва Моn Аtоm ўртасида хизмат кўрсатиш бўйича стратегик шартнома имзолашни режалаштирмоқда. Шунингдек, икки давлат вакиллари истиқболли уран конлари бўйича геологик ва экологик лойиҳа ҳужжатларини ишлаб чиқиш ҳамда лицензия олиш учун зарур ҳужжатларни Мўғулистон ваколатли органига тақдим этишни режалаштирмоқда.
Бундан ташқари, лицензиялар расмийлаштирилгандан сўнг геология-қидирув ишларини амалга ошириш учун Мўғулистонда фаолият юритаётган бурғулаш ва геофизика компаниялари билан шартномалар тузиш бўйича музокаралар олиб борилмоқда.
Хусусан, биринчи босқичда ажратилган майдонларда қарийб 60 минг погон метр ҳажмдаги комплекс бурғилаш ишларини бажариш режалаштирилган. Натижаларга кўра конларнинг потенциал захиралари баҳоланади ва кейинги босқичдаги геология-қидирув ишлари дастури аниқланади.
