Италия пойтахти Рим шаҳри чеккасида жойлашган Кастел-ди-Гвидо ҳудудида Рим империяси даврига оид ҳашаматли вилла топилди. Бу ҳақда CNN хабар берди.
Маълумотларга кўра, жорий йилнинг февраль ойида маҳаллий аҳоли ҳудудда шубҳали фаолият кузатилгани ҳақида расмийларга хабар берган. Текширув давомида карабинерлар ҳарбий полицияси қадимий археологик жойларда учрайдиган ноқонуний қазиш белгилари – тунда олиб борилган ишлар, тупроқ уюмлари ва рухсатсиз фаолият изларини аниқлаган.
Маълум бўлишича, бир гуруҳ шахслар экскватор ёрдамида панжара тўсиқларини кесиб ўтиб, ер остида яширинган катта иншоотга кирган. Қисқа вақт ичида қазиш ишлари тўхтатилган бўлса-да, бу жараён давомида илгари номаълум бўлган Рим даври вилласининг қолдиқлари очилган.
Археологлар ҳозиргача атриум ва сув йиғиладиган ҳовуз билан жиҳозланган катта зални, шунингдек қора ва оқ рангдаги мураккаб геометрик ҳамда ўсимликсимон нақшли мозаика полларни аниқлаган.
Италия Маданият вазирлиги вакилларининг билдиришича, ушбу ҳудуд қадимда императорлар тез-тез ташриф буюрадиган Лориум манзилига кирган бўлиб, вилла Рим аристократиясининг юқори табақасига тегишли бўлган бўлиши мумкин. Мутахассислар топилмалар орасида мармар безаклар ва Рим табиат худоси Силванга тегишли ҳайкал қолдиқларини топганини ҳам қайд этган.
Расмийлар қазиш ишлари натижасида иншоотга қисман зарар етганини, бироқ қимматли артефактлар йўқолган ёки йўқлиги ҳали аниқ эмаслигини билдирган. Ҳозирда археологик қазиш ишлари давом этмоқда. Ташриф буюрувчилар эса ушбу тарихий ҳудудни олдиндан рўйхатдан ўтган ҳолда кўриш имкониятига эга бўлади.
