Фарғона ва Самарқанд вилоятларида жами қарийб 3,5 миллиард кредит ажратиб бериш эвазига улуш талаб қилган банк ходимлари қўлга олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, департаментнинг Фарғона вилояти бошқармаси ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда тижорат банки БХМ бошлиғи Р.С. тадбиркорлик фаолияти билан шуғулланиши учун кредит ажратишни сўраб мурожаат қилган фуқаро Ф.Р.нинг ишончига кириб, унга 2,5 миллиард сўм кредит ажратиб беришни ваъда қилган. Бунинг эвазига ушбу кредит миқдорининг 5 фоизини, яъни 125 миллион сўмини олдиндан беришини айтиб, ушбу пул ҳисобидан 10 000 АҚШ долларини олган вақтида ашёвий далиллар билан ушланган.
Бундан ташқари, Самарқанд вилоятида ҳам тижорат банки БХМ бошлиғи Д.И. “D.D.” МЧЖ раҳбари Д.М.га 75 000 АҚШ доллари кредит маблағи ажратиб берганлиги эвазига олган 2 150 АҚШ доллари ҳисобидан 10,7 миллион сўмини қайтариб берган вақтида ашёвий далиллар билан ушланган.
Билдирилишича, мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
