Италия пойтахти Римда ўрта асрларга оид Конти минорасининг бир қисми қулаб тушди. Вайроналар остидан тўрт киши олиб чиқилди, улардан бири вафот этди. Бу ҳақда BBC хабар берди.
Маълум қилинишича, ҳодиса 3 ноябрь куни юз берган, бино реставрация қилинаётган бўлган. Жароҳатланганларнинг бари минора ичкарисида қолган ишчилар ҳисобланади. Дастлаб уч киши касалхонага олиб кетилган.
Вайроналар остидан тўртинчи ишчини олиб чиқиш жараёнида минорада яна қулаш содир бўлган. Таъкидланишича, Октай Строичи исмли ишчи деярли ўн икки соат ўтгач, вайроналар остидан олиб чиқилган. Бироқ тез ёрдам машинасида унинг юраги тўхтаб қолган. Шифокорлар ишчининг ҳаётини қутқара олмаган.
Руминия Ташқи ишлар вазирлиги таъкидлашича, Строичи Руминия фуқароси ҳисобланади. Вайроналар остидан олиб чиқилган ишчилардан бирининг аҳволи оғир. Воқеа жойига Рим мери Роберто Галтери ва маданият вазири Алессандро Жули ташриф буюрган. Пойтахт прокуратураси тергов бошлаган.
Минора 1203 йилда Папа Иннокентий III ва Сеня графлари буйруғи билан Рим тинчлик ибодатхонаси ўрнида турар жой ва мудофаа иншооти сифатида қурилган.
Миноранинг дастлабки баландлиги 50 метрдан ортиқ эди, ҳозирда у зилзилалар ва шаҳарни қайта қуриш натижасида қулашлар туфайли 29 метрдан ошмайди.
