Астрономлар коинотда биринчи марта яшил рангдаги юлдузни топди. 65 ёруғлик йили масофасидаги бу кашфиёт оқ митти юлдузлар турлича рангда бўлишини кўрсатди. Бу ҳақда The Independent хабар берди.
Оқ миттиларнинг ноодатий ранглари
Одатда юлдузларнинг ранги уларнинг ҳароратига қараб белгиланади. Совуқроқ юлдузлар оловранг, нисбатан иссиқроқ бўлганлари (масалан, Қуёш) оқ, энг қайноқ юлдузлар эса оч мовий рангда товланади.
Илгари олимлар Қуёшга ўхшаган обектлар ўлимидан кейин ҳосил бўладиган оқ митти юлдузлар ҳам худди шу қоида бўйича ўзгаради деб ўйлаган эди. Бироқ янги тадқиқот оқ митти юлдузлар пушти, сариқ, бинафша ва ҳатто яшил рангда ҳам товланишини исботлади.
“Кўпчилик юлдузларнинг ранги фақат ҳароратга боғлиқ. Лекин оқ миттилар биз кутмаган рангларни ҳосил қилар экан”, дейди Уорвик университети олими Марк Ҳолландс.
Бу юлдузлар жуда зич жойлашган. Уларнинг атмосферасидаги кимёвий элементлар нурни ютади ва турли рангларни акс эттиради.
Тарихдаги илк яшил юлдуз
Олимлар эътиборини WD J1330+6435 деб номланган оқ митти юлдуз тортди. Унинг ҳарорати тахминан Селсий бўйича 4000 даражани ташкил этади. Юлдуз ўз атрофидаги сайёралар қолдиқларидан кальций, литий ва натрий моддаларини тортиб олган.
“Юлдуз атмосферасидаги натрий моддаси оловранг нурни ютади. Натижада юлдузда ғаройиб яшил ёғду ҳосил бўлади”, дейди доктор Ҳолландс.
Бошқа рангдаги юлдузлар
Тадқиқот давомида Ерга яқин жойлашган 151 та оқ митти юлдуз ўрганилди. Улардан бештаси ўзгача рангга эга бўлиб чиқди: иккитаси сариқ, учтаси эса пушти рангда товланади.
Шунингдек, олимлар тарихдаги энг қизил юлдузни ҳам аниқлади. WD J1011+2845 номли ушбу юлдуз Ердан 48 ёруғлик йили узоқликда жойлашган. Ушбу илмий иш RAS Techniques аnd Instruments журналида чоп этилди.
