Хитойнинг NeodraDynamics Robotics компанияси баландлиги тўрт метрга яқин, Neo1 гуманоид роботини тақдим этди. У оғир юкларни кўтариш ва мураккаб саноат ишларини бажариш учун ишлаб чиқилган. Бу ҳақда Interesting Engineering хабар берди.
Робот Хитойда ўтказилган CIIF 2026 халқаро саноат кўргазмасида JD Industrial компанияси билан ҳамкорликда намойиш этилди. Ишлаб чиқарувчининг маълум қилишича, Neo1 оддий электр двигателли роботлар уддалай олмайдиган оғир вазифаларни бажаришга мўлжалланган.
Робот нималарга қодир?
Neo1 нинг танасида мураккаб ҳаракатларни бажаришга имкон берадиган 41 та ҳаракат механизми мавжуд. Улардан 39 таси гидравлик тизим, қолган иккитаси эса электр двигателлари ёрдамида ишлайди.
Гидравлик механизмлар махсус суюқлик босими орқали катта куч ҳосил қилади. Ҳар бир механизмнинг оғирлиги тахминан бир килограмм бўлса-да, ишлаб чиқарувчига кўра, улар бир неча тонналик тортиш кучини юзага келтира олади. Компания маълумотида айтилишича, робот икки қўли билан жами 500 килограммгача юк кўтаришга мўлжалланган.
Neo1 нафақат кучи, балки ҳаракатларининг аниқлиги билан ҳам ажралиб туради. Бу имконият оғир деталларни аниқ жойлаштириш талаб этиладиган мураккаб йиғиш ишларида қўл келиши мумкин.
Бироқ гидравлик тизимдан фойдаланишнинг ўзига яраша қийинчиликлари бор. Жумладан, суюқлик босимини назорат қилиш, унинг сизиб чиқишининг олдини олиш ва механизмларнинг қизиб кетмаслигини таъминлаш зарур.
Neo1 да гидравлик механизмлар электр бошқарув тизими билан бирлаштирилган. Бу роботга оғир юкларни кўтариш билан бирга, ҳаракатларни аниқ бажариш имконини бериши кутилмоқда.
Роботдан қаерларда фойдаланиш мумкин?
NeodraDynamics компанияси Neo1 дан фақат заводларда эмас, балки бошқа мураккаб ва хавфли шароитларда ҳам фойдаланишни режалаштирмоқда.
Масалан, робот портларда оғир юкларни ташиши, йирик ускуналарни йиғиши ҳамда юқори ёки паст ҳароратли, ифлос муҳитларда ишлаши мумкин.
Компания ундан атом энергетикаси обектларида ҳам фойдаланиш имкониятини кўриб чиқмоқда. Ишлаб чиқарувчиларнинг айтишича, радиацияга чидамли гидравлик механизмлар ёрдамида робот ядро ёқилғиси билан ишлаши ва ускуналарга техник хизмат кўрсатиши мумкин. Бироқ бунинг учун аввало унинг радиация ва хавфсизлик талабларига жавоб бериши синовдан ўтказилиши керак.
Бундан ташқари, Neo1 сув остида юқори босим шароитида таъмирлаш ишларини бажаришга ҳам мўлжалланган. Конларда эса хавфли иншоотларни бузиш, вайроналарни тозалаш ва оғир буюмларни кўчиришда ёрдам бериши мумкин.
Табиий офатлар юз берган ҳудудларда ҳам ундан фойдаланиш режалаштирилмоқда.
Роботнинг имкониятлари ҳали тўлиқ синовдан ўтмаган
Мутахассисларнинг таъкидлашича, ҳозирча булар роботдан фойдаланиш мумкин бўлган йўналишлар, холос. Neo1 барча вазифаларни амалда бажара олиши ҳали мустақил синовларда тасдиқланмаган.
Хусусан, роботнинг саноат корхоналарида узоқ вақт узлуксиз ишлаши, оғир шароитларга чидамлилиги ва ишончлилигини текшириш зарур.
Шу сабабли Neo1 нинг ҳақиқий имкониятлари ва самарадорлиги келгусидаги амалий синовлардан кейин аниқ бўлади.
